▬ Acroshow

A profesora Ana Santos, do IES Valle Inclán, preséntanos así o seu proxecto Acroshow, despois de ser seleccionada para a súa intervención nas II Xornada eTwinning, durante o pasado sábado.

"Coa axuda dun baremo único de Acrosport, grupos de dous institutos diferentes, un francés e outro español, compoñeron unha coreografía con música.

O día da avaliación, as coreografías foron filmadas e enviadas ao outro instituto para seren vistas e avaliadas polo grupo correspondente, con cirterios moi precisos e coñecidos polos alumnos. Un power point acompaña cada video, presentando aos membros do grupo, a súa idade, hobbies, proxecto escolar e profesional, instituto, cidade, unha foto das pirámides de acrosport realizadas, a música, o tema, a roupa e os eventuais accesorios...

De volta, cada grupo debe pór unha nota escrita e argumentada e acompañada dun comentario oral, filmado, expresando a súa opinión."

Desenvolvemento da II Xornada eTwinning

A apertura da Xornada correu a cargo de Ángel Sebastián, asesor eTwinning na Consellería. Aproveitou para facer un recordo ao décimo aniversario do programa, lendo unha carta do Comisario Europeo de Educación. 

A partir daí, presentou a Rosario Ortega Pérez, asesora técnica do Ministerio e  representante   do Servizo Nacional.

Rosario iniciou a súa sesión cunha ferramenta participativa para facernos a idea de cal era o coñecemento dos asistentes sobre o programa. Despois, cun discurso motivador, fixo un percorrido pola plataforma e as súas características.

Igualmente, mostrou proxectos que estaban en relación co desenvolvemento e adquisición de competencias clave.

Finalizou a mañá coa intervención dos representantes da Embaixada eTwinning para a presentación do novo escritorio, o eTwinning Live, que xenerou a participación dos asistentes nunha rolda de preguntas.

Xa na tarde, houbo lugar para obradoiros concretos: "Traballando con eTwinning en centros Abalar e eDixgal", "Proxectos básicos e Kits eTwinning", "Erasmus+, FP e CLIL" e un obradoiro práctico "Rexistro e primeiros pasos na plataforma eTwinning", a cargo de Mela Rodríguez, Susana Vázquez, Marcos Vence e Cristina París, respectivamente.

O momento final foi compartido por Ana María Santos, Aarón Bermudez, Patricia Conde e Francisco Núñez, que compartiron con todos os seus proxectos, recentemente galardonados con Selos de Calidade.




Vídeo resumo da II Xornada

II Xornada eTwinning en Galicia

O próximo sábado 24 de outubro, celebrarase en Santiago (EGAP) a segunda Xornada eTwinning.

As sesións comezarán ás 10:00 e finalizarán as 20:00, combinando nelas intervencións de profesores eTwinners que presentarán os seus proxectos e compoñentes da Embaixada eTwinning que achegarán novidades e cuestións técnicas na plataforma e no desenvolvemento de proxectos. A Conferencia inaugural correrá a cargo de Rosario Ortega Pérez, do Servizo Nacional de Apoio.

Durante a mañá, a Embaixada  e o Asesor eTwinning na Consellería presentarán o novo Escritorio, eTwinning Live.

Xa na tarde, repartirase o tempo entre obradoiros prácticos e relatorios sobre diferentes aspectos de eTwinning: F.P., planificación de proxectos básicos, relación con Abalar, E-Dixgal, CLIL...

Podedes seguir o desenvolvemento da Xornada neste enlace.

Este é o programa da sesión.

Documentación no TwinSpace da Embaixada.

Conferencia Anual eTwinning 2015

Durante os días 22, 23 e 24 terá lugar a Conferencia Anual eTwinning 2015 en Bruselas e estará dedicada á participación cidadá.





Imaxe de https://www.etwinning.net/es/pub/news/news.htm

Máis de 500 docentes de todos os rincóns de Europa participarán en obradoiros e charlas que favorecerán o seu desenvolvemento profesional e mellorarán a súa formación, na percura da optimización da súa docencia, co eTwinning como liña vehicular.

As sesións plenarias poden verse en streaming, neste enlace.

RuralSchoolCloud Final Conference

A Embaixada eTwinning foi convidada a participar na Conferencia Final do Proxecto RuralSchoolCloud que se celebrou o pasado sábado no Pazo de Fonseca, en Santiago de Compostela.

O espectacular contorno contou coa participación de profesorado galego, británico, grego, danés e italiano, todos implicados, ao longo dos últimos anos, na "Escola na nube". 

Foi inaugurado polo Conselleiro de Educación en Galicia, Román Rodríguez, e presentado por Carmen Morante, Decana da Facultade de Pedagoxía da USC, que participou na investigación e implementación deste proxecto de escola.

Durante a mañá, os asistentes puideron coñecer de primeira man a evolución do proxecto e as experiencias nos centros implicados, presentadas por María R Malmierca, coordinadora do proxecto desde o CESGA.

Xa na tarde, celebrouse unha sesión de Intercambio de iniciativas sobre escola, ruralidade e TIC, na que as participacións tiveron que ver con EDIXGAL, o uso de Tablets na educación, XIS e eTwinning, todos eles proxectados sobre a escola rural de Galicia, con experiencias concretas por parte dos profesores convidados.

Projetos eTwinning de FP - 14 ideias

A Direção-Geral da Educação, do Ministério da Educação e Ciência de Portugal, edita a versión en portugués do libro Projetos eTwinning de FP - 14 ideias, unha iniciativa da Embaixada eTwinning Galicia co patrocinio do IES San Clemente de Santiago de Compostela.

Queremos agradecer a todas as persoas que fixeron posible esta edición, en especial a Laura Filipe do SNA eTwinning de Portugal, e en xeral ao SNA luso que tan ben acolleu e valorou esta iniciativa.

Os exemplares serán distribuídos en breve nas escolas portuguesas.

Máis información:

http://embaixadaetwinning.blogspot.com.es/p/publicacions.html