13 novembro 2014

▬ Viajando por el mundo a través de los cuentos

Susana Fontán, do Colexio Internacional SEK-Atlántico de Poio, vén de recibir o Selo de Calidade Europeo por este proxecto, que levaron a cabo durante dous cursos con alumnos de 3º e 5º de Educación Primaria. A través das súas actividades traballáronse todos os obxectivos de expresión oral e escrita de Lingua Castelá e Lingua Galega, ademais de servirnos como ferramenta para traballar dun xeito diferente, e sobre todo atractivo para os alumnos, a diferenciación dentro da aula e a utilizacións das TIC no día a día dos rapaces e rapazas.



Traballamos cun centro italiano, un de Murcia (con nenos de Educación Infantil) e con varios centros españois no estranxeiro dependentes do CIDEAD.

O proxecto dividiuse en 6 bloques (un por trimestre): o corpo humano, a historia, o medio ambiente, a comida, os animais e ciencia ficción. En cada bloque se versionaba un conto clásico ou lenda, arredor do cal se incluían diferentes actividades coas que intentamos facer partícipes do noso traballo á toda a comunidade escolar. Así no corpo humano os protagonistas do Mago de Oz chegan a Galicia e viaxan por toda España ata Murcia; na historia traballamos lendas do Camiño de Santiago; na comida una Brancaneves moi moderna quédase no paro e abre unha tenda de comidas típicas galegas acompañada por sete amigos moi especiais que viaxan por toda Europa buscando novas receitas; no medo ambiente temos unha bela dormente que queda durmida pola agulla dunha redeira, coa que coñeceremos a flora das zonas de costa (Cambados) e interior (Ribeira Sacra); nos animais catro representantes da fauna galega parten de catro mosteiros (Samos, San Estevo de Ribas de Sil, a Armenteira e Sada) e chegan a Santiago, onde coñecen o Mestre Mateo). En ciencia ficción crearon as súas propias películas en 3D con personaxes que nos presentan a vida en Galicia…



Ademais dos contos, cada bloque se completou con actividades diversas: rodamos a nosa propia película contando a historia de Pontevedra; tivemos un concurso de fotografía sobre a natureza con tres categorías: alumnos, profesores e familiares; fixemos un libro dixital con receitas galegas e españolas; visitamos un pazo galego guiados por César Portela; un investigador do CSIC nos deu unha charla… Actividades nas que participou toda a comunidade do colexio.


Tamén tivemos actividades propias do Nadal: intercambio de tarxetas cos socios, Día do Libro (informativo especial sobre as obras favoritas dos profes e estudo da obra de Quino), Día das Letras Galegas…

Todo isto con ferramentas TIC: muvizu, word, power point, prezi, programas para montar películas, visita a un estudo de gravación para darlle voz ós nosos heroes en 3D, aprender a tratar dixitalmente fotografías, chat, videoconferencias… un mundo novo e diferente para aprender unha lingua.

Con este proxecto alcanzamos e superamos todos os obxectivos propostos, ademais de lograr que 73 nenos se divertisen aprendendo.

Invitámosvos a visitar a páxina do proxecto na plataforma e no noso blogue de clase, esperamos que vos guste.